Афғонистон: Маҳви 80 силоҳбадаст дар тозатарин амалиёти поксозӣ

Душанбе, 23.10.2015. (АМИТ «Ховар»). – Дар ҷараёни амалиёти поксозӣ дар давоми 24 соати гузашта, ки дар манотиқи гуногуни Афғонистон гузаронида шуд, 80 силоҳбадаст маҳв гардид. Дар ин бора имрӯз Вазорати дифои Афғонистон иттилоъ дод.
Бино ба изҳороти Вазорати дифои Афғонистон, дар натиҷаи амалиёт 80 силоҳбадаст безарар гардида, 31 тани дигар ҷароҳат бардоштааст. Дар изҳорот гуфта мешавад, ки амалиёт дар музофоти Пактико, Каписо, Мадиан, Вардак, Зобул, Ҳирот, Бодғис, Қундуз ва Ҷузҷон гузаронида шуд.
Инчунин дар изҳорот омадааст, ки зимни амалиёт миқдори зиёди яроқу аслиҳа дарёб ва мусодира гардида, минаҳои сарироҳӣ безарар гардонида шудаанд.