Ҳайати гурӯҳи кории Давлати Қатар ба Душанбе меояд

Душанбе, 30.10.2015.(АМИТ «Ховар»).-Ҳайати гурӯҳи кории Давлати Қатар 1 ноябри соли равон озими Душанбе -пойтахти Тоҷикистон мегардад. Зимни сафар ба Тоҷикистон ҳайати гурӯҳи кории Қатар аз сохтмони иншооти масҷиди калон, ки бо сармоягузории ин кишвар дар Душанбе бунёд мегардад,  боздид менамояд. Ҳайати қатарӣ ҳамзамон бо роҳбарияти вазоратҳои рушди иқтисод ва савдо,  корҳои дохилӣ, кишоварзӣ, Кумитаи давлатии сармоягузорӣ ва идораи амволи давлатӣ, Кумитаи меъморӣ ва сохтмон, Бонки миллии Тоҷикистон ва «Фурудгоҳи байналмилалии Душанбе» мулоқот анҷом  медиҳад. Интизор меравад, ки дар ҷараёни  мулоқот бо роҳбарону намояндагони вазорату идораҳои марбутаи Тоҷикистон гурӯҳи кории Давлати Қатар масоили марбут ба таҳкими ҳамкории мутақобилан судмандро байни ду кишвар дар бахшҳои иқтисоду тиҷорат, молия, бонкӣ,  сармоягузорӣ, кишоварзӣ, ҳифзи ҳуқуқ, энергетика, нақлиёт, геология ва   туризм баррасӣ намоянд. 
Бояд тазаккур дод, ки дар ҳайати гурӯҳи кории Давлати Қатар роҳбарону намояндагони вазорату идораҳо ва ширкатҳои ин кишвари арабӣ шомиланд. Сафари гурӯҳи кории  Давлати Қатар ба Тоҷикистон то 3 ноябр идома меёбад. Давлати Қатар аз кишварҳои арабии Халиҷи Форс аст, ки дар Тоҷикистон ду тарҳи калон — сохтмони масҷиди бузург ва бунёди шаҳракеро дар Душанбе бо номи «Диёри Душанбе» сармоягузорӣ менамояд.