Қаноатмандӣ аз фаъолияти БАТР дар Тоҷикистон
Душанбе, 09.09.2015, (АМИТ «Ховар»).-Масъалаҳои муҳими омӯзишию тадқиқотӣ, аз қабили муайян намудани нақши Намояндагии доимии Бонки аврупоии таҷдид ва рушд дар ҷумҳурӣ ва мусоидати он ба бахши тиҷорату мақомоти давлатӣ, сабабҳо ва усулҳои ҳамкорӣ бо бонки номбурда, самаранокии фаъолияти Бонки аврупоии таҷдид ва рушд дар маҳалҳо, саҳми он дар рушди мамлакат ва фарқи он назар ба дигар ташкилотҳои байналмилалии молиявӣ, ки дар кишвари мо фаъолият доранд, зимни вохӯрии муовини якуми раиси Бонки миллии Тоҷикистон Ҷ. Нуралиев бо муовини сардори Шуъбаи баҳодиҳии таҳлилӣ ва дастгирии Бонки аврупоии таҷдид ва рушд Леонард Кайт, ки 8 октябри соли равон баргузор гардид, мавриди муҳокима қарор дода шуд.
Муовини сардори Шуъбаи баҳодиҳии таҳлилӣ ва дастгирии Бонки аврупоии таҷдид ва рушд Леонард Кайт изҳор намуд, шуъбаи онҳо сохтори мустақил буда, танҳо ба Шӯрои мудирони бонк ҳисобот медиҳад ва вазифаи асосии он таҳлили ҳамаҷонибаи фаъолияти намояндагиҳои бонк дар кишварҳои дунё ва баҳогузорӣ кардани натиҷаи кори онҳо мебошад.
Тибқи нақша кормандони шуъба аз 37 намояндагии доимии бонк, ки дар мамолики мухталифи дунё фаъолият доранд, дидан менамоянд, дар байни мутахассисони намояндагиҳо назарпурсиҳо мегузаронанд ва илова бар ин, бо роҳбарони вазорату ташкилот ва бонкҳои марказии ин ё он давлат мулоқот анҷом медиҳанд. Баъди анҷоми тадқиқоти худ ба Шӯрои мудирони Бонки аврупоии таҷдид ва рушд ҳисоботи муфассал пешниҳод мекунанд.
“Мо аз фаъолияти Намояндагии доимии Бонки аврупоии таҷдид ва рушд дар Душанбе қаноатманд ҳастем, зеро тайи солҳои тӯлонӣ бонки мазкур бо Ҷумҳурии Тоҷикистон ҳамкории зич дорад ва дар сармоягузории лоиҳаҳои муҳими бахшҳои давлатӣ, молиявӣ ва хусусӣ саҳми босазо гузоштааст. Ҳамчунин дар айни замон якчанд лоиҳаи дигар дар соҳаҳои мухталифи иқтисоди ҷумҳурӣ мавриди амал қарор дорад”,-гуфт Ҷ.Нуралиев.
Ҷонибҳо дар анҷоми суҳбат бо бовар изҳор доштанд, ки таҳлил ва тадқиқи ҳамаҷонибаи фаъолияти Намояндагии доимии Бонки аврупоии таҷдид ва рушд дар Душанбе барои дар сатҳи сифатан нави ҳамкории судманд ба роҳ мондани муносибатҳои дуҷониба мусоидат хоҳад кард.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






