Боркашонӣ бо ҳамаи намудҳои нақлиёт 2,8 фоиз зиёд шуд

Душанбе, 24.10.2015. (АМИТ «Ховар»).-Дар нуҳ моҳи соли 2015 бо ҳамаи намудҳои нақлиёт 58027,9 ҳазор тонна бор кашонда шудааст, ки нисбат ба ҳамин давраи соли гузашта 2,8 фоиз зиёд аст.
Бо нақлиёти истифодаи умум 12571,3 ҳазор тонна бор кашонда шудааст, ки 21,7 фоизи бори умумии дар ҷумҳурӣ кашондашударо ташкил медиҳад, бо нақлиёти автомобилии вазорату идораҳо 14818,7 ҳазор тонна (25,5 фоиз), бо нақлиёти соҳибкороне, ки ба боркашонии тиҷоратӣ машғуланд, 29788,6 ҳазор тонна (51,3 фоиз), бо нақлиёти байналмилалӣ 849,3 ҳазор тонна (1,5 фоиз) бор кашонда шудааст.
Таносуби боркашонии нақлиёти автомобилӣ дар ҳаҷми умумии боркашонӣ 92,4 фоизро ташкил дод.
Дар нӯҳ моҳи соли 2015 бо нақлиёти роҳи оҳан 4415,9 ҳазор тонна бор кашонда шудааст, ки нисбат ба ҳамин давраи соли гузашта 91,0 фоиз ва бо нақлиёти ҳавоӣ 1,6 ҳазор тонна бор кашонда шудааст, ки нисбат ба ҳамин давраи соли гузашта 83,1 фоизро ташкил дод.
Гардиши бор бо ҳамаи намудҳои нақлиёт дар нӯҳ моҳи соли 2015 ба 4715,4 млн.т.км расид ва нисбат ба ҳамин давраи соли гузашта 1,1 фоиз кам шудааст.
Дар нуҳ моҳи соли 2015 бо ҳамаи намудҳои нақлиёти мусофирбар 421,9 млн. мусофир кашонда шудааст, ки нисбат ба ҳамин давраи соли гузашта 1,4 фоиз зиёд шудааст.
Аз шумораи умумии мусофирони кашондашуда, бо нақлиёти истифодаи умум 129,5 млн. мусофир ё 30,7 фоизи ҳаҷми умумии мусофирбарӣ анҷом дода шудааст ва нисбат ба ҳамин давраи соли гузашта ҳаҷми мусофирони кашондашуда 9,1 фоиз афзудааст.
Бо нақлиёти автомобилӣ (бе назардошти нақлиёти таксомоторӣ) дар давраи ҳисобот 410,6 млн. мусофир кашонда шудааст, ки ин нисбат ба ҳамин давраи соли 2014-ум 101,3 фоизро ташкил медиҳад.
Бо нақлиёти барқӣ дар нӯҳ моҳи соли 2015-ум 6953,5 ҳазор мусофир кашонда шудааст, ки ба сатҳи ҳамин давраи соли гузашта баробар мебошад.