Боздиди гурӯҳи филмбардорони АМА аз Тоҷикистон

Душанбе, 15.10.2015 (АМИТ «Ховар»).-Имрӯз раиси Кумитаи ҷавонон, варзиш ва сайёҳӣ Аҳтам Абдуллозода як гурӯҳи филмбардоронро, ки аз Аморати Муттаҳидаи Араб ба Тоҷикистон омадаанд, ба ҳузур пазируфт.
Аҳтам Абдуллозода зимни мулоқот бо ҳайати меҳмонон, роҷеъ ба имкониятҳои соҳаи сайёҳӣ маълумот дод. Гуфта шуд, ки Ҷумҳурии Тоҷикистон бо кӯҳҳои баланду обҳои мусаффо ва мавзеъҳои таърихию диданӣ ҳамчун кишвари сайёҳӣ аллакай эътироф гардидааст. Аз ин рӯ, аз гурӯҳи филмбардорон даъват  шуд, ки тавассути хатсайри омодагардида аз мавзеъҳои сайёҳии Тоҷикистон, ба мисли Қалъаи Ҳисор, мақбараи Мир Сайид Алии Ҳамадонӣ, водии Зарафшон, Вилояти Мухтори Кӯҳистони Бадахшон ва чашмаҳои шифобахш дидан намоянд.
Ҳамчунин таъкид гардид, ки барои ошноии бештар бо фарҳангу тамаддуни халқи тоҷик, суруду мусиқиҳои классикию халқӣ гурӯҳи филмбардорон дар барномаҳои фарҳангӣ, ки дар Боғи Ирам доир мегарданд, иштирок варзанд.
Гурӯҳи филмбардорони АМА аз пазироии самимӣ изҳори сипос карда, таъкид доштанд, ки Тоҷикистон барои онҳо хеле муҳим буда, мақсад аз сафарашонро шиносоии наздик бо фарҳанг, анъанаҳои миллӣ ва санъати тоҷикон арзёбӣ намуданд.
Филмбардорони араб  ба бештар аз 77 давлати дунё сафар карда, роҷеъ ба соҳаи сайёҳӣ ва анъанаву фарҳанги миллии онҳо филмҳои гуногун таҳия кардаанд. 
Бино ба иттилои Наврӯз Қурбонов, мутахассиси пешбари бахши таҳлилу иттилооти Кумитаи ҷавонон, варзиш ва сайёҳӣ, дар доираи ин сафар гурӯҳи мазкур тасмим гирифт, ки роҷеъ ба фарҳангу тамаддун ва мавзеъҳои сайёҳии Тоҷикистон филм омода намоянд. Филми мазкур дар шабакаи телевизионии “Акс Алӣ”-и Аморати Муттаҳидаи Араб, ки дар бештар аз 20 давлати дунё тамошобин дорад, пахш  мешавад.