Бунёди Коллеҷи тиббӣ дар Рашт

Рашт, 03.10.2015 (АМИТ «Ховар»).-Дар ноҳияи Рашт бо маблағгузории  Дирексияи сохтмони иншооти ҳукуматии назди Дастгоҳи иҷроияи Президенти Ҷумҳурии Тоҷикистон  ва Вазорати тандурустӣ ва ҳифзи иҷтимоии аҳолӣ   бинои сеошёнаи таълимии Коллеҷи тиббӣ ва бинои сеошёнаи  хобгоҳи донишҷӯён ба наздикӣ ба истифода дода мешавад.
 Бинои Коллеҷи тиббӣ  барои таълими 700 донишҷӯ дар ду баст сохта шудааст. Ҳамчунин  дар дохили бино ошхона, китобхона, қироатхона, маҷлисгоҳ ва озмоишгоҳ сохта  шудааст.
Коллеҷи тиббии ноҳияи Рашт соли 1992 таъсис ёфта,  имрӯз дар  назди беморхонаҳои марказии ноҳияҳои  Ҷиргатол, Тоҷикобод, Тавилдара ва Нурообод гурӯҳҳои мақсадноки зертобеаш фаъолият доранд.  Дар муассисаи мазкур ва гурӯҳҳои мақсаднок  ҳоло  825 ҷавон  таҳсил менамоянд, ки нисбат ба соли гузашта 125 нафар зиёд аст ва ба таълими онҳо 107 омӯзгор машғуланд.