Дар Панҷакент нашъаҷаллоби қаблан судшуда дастгир гардид

Душанбе, 06.09.2015, (АМИТ Ховар). — Аз тарафи кормандони Шуъбаи байниноҳиявии Зарафшони Раёсати Агентии назорати маводи нашъаовари назди Президенти ҶТ дар вилояти Суғд дар ҳудуди ҷамоати Саразми шаҳри Панҷакент бо гумони даст доштан дар муомилоти ғайриқонунии маводи нашъаовар ду сокини маҳаллӣ дастгир шуданд, ки аз онҳо як бастаи полиэтиленӣ бо маводи ҷигариранг мусодира гардид.   
Мутобиқи хулосаи  ташхис маводи мусодирашуда афюн мебошад.   
Тавре ки тафтишоти пешакӣ нишон дод, яке аз дастгиршудагон қаблан барои даст доштан дар муомилоти ғайриқонунии маводи нашъаовар суд шуда будааст, аммо пас аз адо намудани ҷазо боз даст ба ҷиноят задааст. 
Аз рӯи ҳодисаи мазкур аз тарафи Шуъбаи тафтишоти Раёсати агентӣ парвандаи ҷиноӣ бо моддаи 200 қ.2 КҶ ҶТ «Муомилоти ғайриқонунии воситаҳои нашъадор ё моддаҳои психотропӣ бо  мақсади   ба соҳибияти каси дигар додан ба миқдори начандон калон» оғоз гардидааст ва тафтиш давом дорад. 
Боздоштшудагон дар тавқифгоҳи нигоҳдории муваққатии Раёсати агентӣ қарор доранд.