Кишоварзони Хатлон пешсафи маъракаи пахтачинианд

Душанбе, 28.10. 2015. (АМИТ «Ховар»). — Тибқи дурнамо имсол дар ҷумҳурӣ истеҳсоли пахта 398 ҳазору 220 тоннаро ташкил медиҳад ва мувофиқи маълумоти Раёсати растанипарварии Вазорати кишоварзии ҷумҳурӣ  то 23 октябр дар ҷумҳурӣ дар як рўз ба миқдори 2876 тонна ва аз аввали мавсим 266 ҳазору 163 тонна пахта ҷамъоварӣ шудааст, ки баробари 66,8 фоизи дурнамо мебошад. Дар ҷамъоварии ҳосили пахта 94992 нафар чинакчиён машғули кор мебошанд.
Кишоварзони вилояти Хатлон то 23 октябр  ба миқдори 195 ҳазору 560 тонна ҳосили пахта ҷамъоварӣ намудаанд, ки баробари 71 фоизи дурнамо мебошад. Дар вилояти мазкур барои ҷамъоварии саривақтии ҳосили пахта 89 ҳазору 303  чинакчӣ сафарбар шудааст. 
Кишоварзони вилояти Суғд низ муташаккилона машғули ҷамъоварии ҳосили пахта мебошанд, ки то 23 октябр  ба миқдори 64 ҳазору 969 тонна ҳосили пахта ба даст овардаанд ва он 58 фоизи дурнаморо ташкил медиҳад. Барои ҷамъоварии ҳосили беталафи пахта дар  айни замон 3985  чинакчӣ машғули кор мебошанд. 
Маъракаи ҷамъоварии ҳосили пахта дар ноҳияҳои тобеи ҷумҳурӣ низ идома дошта, пахтакорони ин ноҳияҳо 5634 тонна пахта ҷамъоварӣ намудаанд, ки 51,4 фоизро ташкил медиҳад. Дар маъракаи ҷамъоварии ҳосили пахта 1704 чинакчӣ сафарбар  шудааст.