Мактаби президентӣ-туҳфа ба ҷашн

     Душанбе, 19.10.2015.(АМИТ «Ховар»).- Дар арафаи ҷашни 3000-солагӣ дар ноҳияи Ҳисор Мактаби президентӣ барои хонандагони болаёқат ифтитоҳ гардид. 
Муовини директори Мактаби президентӣ барои хоанандагони болаёқат  дар ноҳияи Ҳисор Мушаррафа Шарифова иттилоъ дод, ки  муассисаи мазкур аз 43 синфхона, 4 озмоишгоҳ, толори фарҳангӣ бо 300 ҷойи нишаст, толори варзишӣ, ду китобхона, аз ҷумла китобхонаи электронӣ, ду хобгоҳи чорошёна, майдони варзишӣ, бинои нӯҳошёнаи дорои 36 ҳуҷра барои истиқомати омӯзгорон ва дигар иншооти ёрирасон иборат мебошад. Мо, омӯзгорон ва хонандагони ин даргоҳи бузурги илму донишу адаб хеде хуштолеъ ҳастем, ки дар ин ҷо илм меомӯзем ва фаъолияти пурсамар дорем. Ҳоло дар баробари хониши дарсҳои муқаррарӣ дар мактаб, омӯзиши дарсҳои иловагӣ ва маҳфилҳои шавқовар мунтазам доир мегарданд. Омодагии ҳамаҷонибаи хонандагон  ба  олимпиадаҳои минтақавӣ, ҷумҳуриявӣ ва байналмиллалӣ бо маром идома дорад. Шароите, ки имрӯз дар муассисаи мо мавҷуд аст, барои хубу аъло хондани ҳар як хонанда имконияти бисёр мусоидро муҳайё кардааст.