Манфред Лорентс: «Шефтаи забон, таърих ва фарҳанги тоҷиконам»

Душанбе, 27.10.2015 (АМИТ «Ховар»).- Шарқшиноси маъруфи олмонӣ профессор Манфред Лорентс дар чорабинӣ бахшида ба 3000-солагии Ҳисор, ки бо ташаббуси Сафорати Тоҷикистон дар Олмон дар шаҳри Берлин баргузор гардид, сухан гуфт. Ҷаноби Лорентс иброз дошт, ки Тоҷикистон кишвари таърихист ва ҳазорон бозёфтҳои қадимӣ аз фарҳангу тамаддуни волои халқи тоҷик шаҳодат медиҳанд. Ҳамзамон шарқшиноси маъруф аз сафари нахустини худ ба Тоҷикистон, ки соли 1957 ба вуқӯъ пайваста буд, ёдовар шуда, аз боздидаш ба қалъаи Ҳисор ба ҳозирин нақл намуд. Манфред Лорентс бо меҳри беандоза бо забони шевои тоҷикӣ ҳарф зада, иброз дошт, ки ман шефтаи забон ва фарҳанги волои тоҷиконам. Профессор ба ҳозирин иттилоъ дод, ки дар айни замон ба навиштани хотираҳояш аз сафарҳо ба Тоҷикистон, дӯстию ҳамкориаш бо олимони тоҷик ва хотираҳояш аз меҳмоннавозии тоҷикон машғул аст.