Маорифчиёни Ҳамадонӣ ба зимистон омодагии пурра мегиранд

Ҳамадонӣ, 31.10.2015 (АМИТ «Ховар»).-Кормандони соҳаи маорифи ноҳияи ба номи Мир Саид Алии Ҳамадонӣ чун дигар ташкилоту корхонаҳо барои зимистонгузаронӣ омода гардидаанд.  Ба гуфти мудири шуъбаи маорифи ноҳия то имрӯз ҳамаи муассисаҳои таълимӣ бо ангишту ҳезум ва дигар намуди маводи сӯхт таъмин  шуда, шишабандии синфхонаҳо ва утоқҳои фаннӣ пурра ба охир расонида шудааст. Дар Гимназияи давлатии ноҳия 310 хонанда таълим мегирад ва барои бомуваффақият паси сар намудани давраи тирамоҳу зимистон тирезаҳои пешина бо тирезаҳои муосир иваз шудаанд. Хонандагону омӯзгорони литсеи давлатӣ низ дар фасли зимистон азият нахоҳанд кашид, зеро бинои муассиса навбунёд буда, бо низоми  гармидиҳии буғӣ таъмин мебошад. Дар анбори муассиса  миқдори зарурии ангишту ҳезум захира шудааст.  Абдулҳафиз Мисралиев — директори  литсеи давлатӣ гуфт, ки Муассисаи таълимии рақами 2-и ноҳия бо хатти тозаи барқ таъмин буда, барои ҳар як синфхона асбоби гармидиҳандаи барқӣ харид гардидаанд. Дар муассисаи мазкур шабакаи мустақили муосири гармидиҳанда сохта шудааст, ки  он дар ҳолати зарурӣ метавонад биноро бо гармӣ таъмин намояд.