Маросими кушодашавии Рӯзҳои фарҳанги миллии Беларус дар Театри опера ва балет

Душанбе, 17.10.2015. (АМИТ «Ховар»). —  Дирӯз дар Театри давлатии опера ва балети ба номи С.Айнӣ бо истиқболи гарму самимии намояндагони баландпояи Ҳукумати Тоҷикистону Беларус, сафирони кишварҳои хориҷӣ, сокинону меҳмонони пойтахт, аҳли зиё, санъаткорону ҳунармандон, донишҷӯёну ҷавонон Рӯзҳои фарҳанги миллии Беларус дар Тоҷикистон расман оғоз гардиданд. Ансамбли давлатии рақс ва суруди Беларус бо намоишномаи пурмӯҳтаво  аз эҷодиёти шифоҳии мардуми Беларус ва санъати волои муосири он дар назди ҳозирин ҳунарнамоӣ карданд. Ҳар як баромади меҳмонон, ки бо либосҳои миллӣ ва анъанаҳои халқи Беларус иҷро мешуданд, бо кафкӯбиҳои тамошобинон пазироӣ гардид.
Ҳамчунин  дар ин шом намоиши аксҳо таҳти унвони «Беларуси муосир» аз хазинаи «БелТА» доир гардид, ки дар он дастовардҳои хоҷагии халқи Ҷумҳурии Беларус дар давоми 20 соли охир бо муқоиса ба солҳои навадуми асри гузашта ба намоиш гузошта шуданд.
Дар назар дошта шудааст, ки меҳмонон дар доираи Рӯзҳои фарҳангӣ бо барномаи консертии хеш ба шаҳри Турсунзода ва ноҳияи Ҳисор сафари ҳунарӣ анҷом диҳанд.