Мулоқоти Қоҳир Расулзода бо Абдураҳмон Маматалиев

Душанбе, 22.10.2015 (АМИТ «Ховар»).- Имрўз Сарвазири мамлакат Қоҳир Расулзода бо муовини Сарвазири Ҷумҳурии Қирғизистон Абдураҳмон Маматалиев, ки барои иштирок дар ҷаласаи Комиссияи байниҳукуматии Ҷумҳурии Тоҷикистон ва Ҷумҳурии Қирғизистон оид ба баррасии  маҷмӯи масъалаҳои дуҷониба  ба Душанбе ташриф овардааст,  мулоқот кард.
Дар мулоқот масоили марбут ба рўзномаи кори ҷаласаи навбатӣ, масъалаҳои вобаста ба тақвияти ҳамкорӣ дар соҳаҳои обу энергетика, роҳу нақлиёт, тиҷорат, ҳамкории наздисарҳадӣ ва масъалаҳои вобаста ба марзи  байнидавлатӣ баррасӣ шуданд.
Тавре ки таъкид гардид, Тоҷикистон ва Қирғизистон  вобаста ба муҳимтарин масъалаҳои ҳамкорӣ дар минтақа мавқеъ ва назари  ягона дошта,  ба таври дуҷониба ва дар доираи созмонҳои байналмилалию  минтақавӣ муносибатҳои неку дўстонаро тақвият мебахшанд.
Ҷонибҳо ҳамчунин доир ба тақвияти ҳамкории дуҷонибаи фарҳангӣ, хусусан гузаронидани чорабиниҳои фарҳангӣ дар ноҳияҳои ҳамсарҳади Тоҷикистон ва Қирғизистон табодули афкор намуданд.