Мусодираи беш аз 70 килограмм маводи мухаддир

Душанбе, 09.10.15. (АМИТ «Ховар»). — Кормандони Агентии  назорати  маводи  нашъаовари  назди  Президенти  ҶТ дар  ҷараёни амалиёти  фаврӣ  дар  канори  шаҳри  Душанбе  7 халтаи дорои  73 брикет (тахтаи хокаи  фушурдашуда) — ро  пайдо  намуданд. Мувофиқи  хулосаи  шуъбаи  таҷзияи  судии  Агентии  назорати  маводи нашъаовар,  хокаи  зикршуда  иборат  аз  71  килограмму 656  грамм ҳашиш  будааст.
Тафтишоти  пешакӣ муайян  намуд, ки моҳи  августи  соли  равон  шаҳрванди  Афғонистон бо  мақсади ба таври  пинҳонӣ  аз  Афғонистон ба  Тоҷикистон  овардани маводи  мухаддир  бо  се  сокини  Тоҷикистон  забон  як  кардааст.
Шаҳрванди зикршудаи  Афғонистон  дар  нимаи  моҳи  сентябр  миқдори  зиёди  маводи  мухаддирро  ба  ноҳияи   Ҳамадонӣ оварда, онро  ба шаҳрванди  Тоҷикистон  супурдааст.
Баъди дидани чораҳои  зарурӣ ду  шаҳрванди  ҶТ  дастгир   шуда, барои боздошти  аъзои  дигари   гурӯҳи  ҷинояткор  чораҳои  зарурӣ  дида  мешаванд.
Аз  рӯи  ин  қазия парвандаи  ҷиноӣ  кушода,  тафтишот  идома дорад.