Мутобиқ намудани қонунгузории миллӣ ба Конвенсияи Гаага

  Душанбе,09.10.2015.(АМИТ«Ховар»).-Палатаи поёнии Парлумони Тоҷикистон 9 октябр ба қонунҳои Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ», «Дар бораи иттиҳодияҳои ҷамъиятӣ», «Дар бораи бақайдгирии давлатии шахсони ҳуқуқӣ ва соҳибкорони инфиродӣ», «Дар бораи боҷи давлатӣ», «Дар бораи дигар пардохтҳои ҳатмӣ ба буҷет» ва Кодекси андози Ҷумҳурии Тоҷикистон тағйиру иловаҳо намуд.
   Парвиз Давлатзода -муовини вазири корҳои хориҷии ҷумҳурӣ зимни суханронӣ дар назди вакилони Маҷлиси намояндагон гуфт, ки ҳадафи ворид намудани тағйирот ба қонунҳои мазкур мутобиқ намудани қонунгузории миллии кишвар ба талаботи Конвенсияи Гаага дар бораи бекор кардани талаботи таъйиди ҳуҷҷатҳои расмии хориҷӣ, ки 5 октябри соли 1961 қабул гардидааст, ба шумор меравад.
   Бояд тазаккур дод, ки Ҷумҳурии Тоҷикистон 29 октябри соли 2014 Конвенсияи Гаагаро ба тасвиб расонида буд.