Насли солим аз оилаи солим аст

Ҳисор, 22.10.2015. (АМИТ «Ховар»).- Баъди таъмиру таҷдиди ҷиддӣ саҳни Мамнуъгоҳи таърихию  фарҳангии  Ҳисор — ин мавзеи таърихӣ  барои баргузории чорабиниҳои гуногун мувофиқтару муносибтар гашт. Имрӯз дар ин ҷо бахшида ба гиромидошти Соли оила чорабинии муҳим — «Солномаи оила» доир гардид. Намояндагони бахши Сабти асноди ҳолати шаҳрвандии шаҳру ноҳияҳои тобеи марказро дар ин ҷо ботантана пешвоз гирифтанд. Меҳмонон бо намоиши либосҳои  миллии арӯсию домодии минтақаҳои гуногуни Тоҷикистон  ошно гардиданд. Сипас, суҳбати оилаҳои ҷавон бо оилаҳои солдида ҷараён гирифт. Дар назди ҳозирин ба 12 ҷуфти навхонадорон шаҳодатномаи ақди никоҳ ва туҳфаҳо супорида шуданд. Ба ду  оилаи беҳтарин, ки яке 50 сол ва дигар 25 сол бо ҳам зиндагӣ кардаанд, туҳфаҳои арзишманд тақдим гардиданд. 
    Тавре ки Нисо Холдорбекова — мудири бахши Сабти асноди ҳолати шаҳрвандии ноҳияи Ҳисор иброз дошт, бахши мазкур ба истиқболи Соли оила силсилачорабиниҳои гуногунро дар тамоми ҳудуди ноҳия барои мустаҳкам кардани оилаҳои ҷавон, пешгирӣ аз никоҳи хешовандӣ, тарбияи насли солим  дар оилаи солим як зумра корҳои муҳимро ба анҷом расонд.