Нигораҳои миллии Тоҷикистон дар Осорхонаи Британия (The British Museum)

Душанбе. 14.10.2015 (АМИТ «Ховар»).- Ба Осорхонаи Британия (The British Museum) нигораҳои миллии Тоҷикистон, аз ҷумла либосҳои миллӣ, зарфҳои хӯрокхӯрӣ, асбобҳои мусиқӣ, кундалҳои анъанавӣ ва ашёи қадими рӯзгори мардуми Тоҷикистон (ҳамагӣ 67 намуд) супорида шуданд, ки онҳо ба намоиш гузошта хоҳанд шуд.
Ташаббуси мазкур аз ҷониби Вазири корҳои хориҷии Ҷумҳурии Тоҷикистон Сироҷидин Аслов дар ҷараёни боздид аз Осорхонаи Британия моҳи июли соли 2014 дар доираи сафар ба Британияи Кабир пешниҳод гардида буд.
Ҳамзамон пас аз сафари Вазири корҳои хориҷӣ ба Британияи Кабир як ҳайати Осорхонаи Британия ба Тоҷикистон сафар намуданд. Зимни боздид намояндагони Осорхонаи Британия аз осорхонаҳои шаҳри Душанбе, маъбади буддои Аҷина-Теппа, шаҳраки Ҳулбук, Саразм ва “Тахти Сангин” дидан карда, маълумоти муҳим доир ба ҷойҳои таърихӣ ва археологии Тоҷикистон ҷамъ оварданд.
Ин иқдом барои барқарор намудани ҳамкорӣ байни осорхонаҳои Тоҷикистон ва Осорхонаи Британия ва густариши робитаҳои фарҳангии ду кишвар мусоидат хоҳад кард.