Низоъҳои идеологӣ ва сиёсӣ дар ҷаҳони ислом

   Душанбе,20.10.2015.(АМИТ «Ховар»).- Маркази исломшиносӣ дар назди Президенти Ҷумҳурии Тоҷикистон тасмим гирифтааст, ки 19 ноябр дар мавзӯи «Дин ва миллат: низоъҳои идеологӣ ва сиёсӣ дар ҷаҳони ислом» конфронси ҷумҳуриявии илмию амалиро гузаронад.
       Интизор меравад, ки дар конфронс масъалаҳои марбут ба омӯзиши заминаҳои назариявӣ ва методологии муносибати миллат ба дин, ҷойгоҳи унсурҳои динӣ дар фарҳанг ва ҳувияти миллӣ, ҷанбаҳои ҳуқуқию сиёсии муносибати давлати дунявӣ ба дин,  нақши унсурҳои динӣ дар низоъҳои идеологии ҷаҳони ислом,  омили динӣ дар бархурди манфиатҳои сиёсии минтақа ва ҷаҳон баррасӣ гарданд.
       Аз Маркази исломшиносии назди Президенти кишвар ба АМИТ «Ховар» иттилоъ доданд, ки дар конфронс ҳамзамон масоили вобаста ба бархурди идеологии идеяи ташаккули миллат бо дин дар олами ислом, равандҳои сиёсии миллатгароӣ дар кишварҳои мусулмоннишин, заминаҳои мавҷудияти миллат-давлатҳои миллӣ дар ҷаҳони ислом, стратегияи сиёсати дохилӣ ва хориҷии давлатҳои мусулмонӣ ва масъалаи ҳифзи миллат-давлат ва мушкилоти муносибати тамаддунҳо дар ҷаҳони ислом матраҳ хоҳанд гардид.