Р. Раҳимзода ҷавонони «Пешоҳанг»-ро ба пешоҳангӣ даъват кард

Душанбе, 08.10.2015 (АМИТ «Ховар»).-Дирӯз, 07 октябри соли равон вазири корҳои дохилӣ Раҳимзода Рамазон Ҳамро дар маҷлисгоҳи Вазорати корҳои дохилӣ бо як зумра ҷавонони гурӯҳи «Пешоҳанг»-и кишвар вохӯрӣ баргузор намуд.
Зимни суҳбати озоду самимӣ бо намояндагони насли ҷавон Рамазон Раҳимзода изҳор дошт, ки яке аз самтҳои асосии мақомоти корҳои дохилӣ таҳким бахшидани робитаи доимӣ бо ҷомеа мебошад. Вохӯрии мазкур низ дар заминаи ҳамкории мақомоти корҳои дохилӣ бо аҳли ҷамоат равона гардидааст.
Дар ҷараёни вохӯрӣ масъалаҳои ҳамкории мақомоти корҳои дохилӣ бо мардум, ба хусус бо ҷавонони фаъоли ҷумҳурӣ дар самти пешгирии шомилшавии шаҳрвандон ба ҳар гуна ҳизбу ҳаракатҳои гуногуни дорои хусусияти террористиву экстремистӣ, тақлид ба фарҳанги бегона, инчунин эҳтиром гузоштан ба рукнҳои давлатдорӣ, пешгирии ақидаҳои ифротгароӣ ва арҷгузорӣ ба арзишҳои миллӣ мавриди баррасӣ қарор гирифтанд.