Рушди туризми экологӣ бо мақсади беҳдошти сифати зиндагӣ

Душанбе, 12.09.2015. (АМИТ «Ховар»).- Кумитаи ҷавонон, варзиш ва сайёҳӣ бо мақсади амалӣ намудани нақшаи  чорабиниҳои Ҳукумати Ҷумҳурии Тоҷикистон оид ба таҷлили ҳафтаи соҳибкорӣ ва нахустин «Рӯзи соҳибкор» дар кишвар дар заминаи баррасӣ намудани нақши соҳаи сайёҳӣ дар рушди фаъолияти соҳибкорӣ ва ҷалби сармоя ба рушди инфрасохтори он, ҳамзамон тарғибу ташвиқи имкониятҳои туристии мамлакат 12 октябри соли 2015 дар ноҳияи Мӯъминободи вилояти Хатлон семинари омӯзишии «Рушди туризми экологӣ бо мақсади беҳдошти сифати зиндагии аҳолии минтақаҳои дурдасти ҷумҳурӣ»-ро доир намуд. Дар семинар муовини раиси Кумитаи ҷавонон, варзиш ва сайёҳӣ Ризо Назарзода, роҳбарияти ноҳия, ҳунармандони маҳалӣ, намояндагони ҷомеаи шаҳрвандӣ ва воситаҳои ахбори омма иштирок намуданд.
Дар  семинар Назарзода Ризо оид ба имкониятҳои сайёҳӣ дар ноҳияи Муъминобод, аз ҷумла, туризми экологӣ ибрози андеша карда, таъкид дошт, ки мавзеъҳои ҷолиби ноҳия, хусусан «Чилдухтарон» имрӯз таваҷҷуҳи сайёҳони дохилию хориҷиро ба худ ҷалб кардааст.   Дар семинар гуфта шуд, ки дар ноҳия имкониятҳои сайёҳӣ зиёданд, аммо то ҳанӯз аз онҳо ба таври васеъ истифода намешавад.
 Дар зимн масъулин тасмим гирифтанд, ки барои боз ҳам рушду инкишоф додани туризм дар маҳал чораҳои заруриро рӯи даст гирифта, таҳияи харитаи туристии ноҳия, афзоиш додани истеҳсоли армуғону туҳфаҳо барои сайёҳон ва фаъол намудани хатсайрҳои туристиро ба роҳ монанд.