Сокинони вилояти Суғд бо маводи нашъаовар дастгир гардиданд

Душанбе, 27.10.2015 (АМИТ “Ховар”).- Аз   ҷониби    кормандони Раёсати Агентии   назорати   маводи нашъаовари назди Президенти Ҷумҳурии Тоҷикистон дар вилояти Суғд дар ҳудуди ноҳияи  Мастчоҳ шаҳрванди 24-солаи муваққатан бекор дастгир  шуд.  Дар натиҷаи кофтукови шахсӣ аз ӯ маводи ҷигарии дорои бӯйи  махсус  дарёфт ва мусодира шуд.
 Мувофиқи маълумотномаи ташхисӣ маводи мусодирашуда воситаи нашъаовари навъи “ҳашиш “ буда, вазнаш  қариб 6 килограммро ташкил дод.  
     Инчунин рӯзи якшанбе  ҳангоми гузаронидани чораҳои фаврӣ аз тарафи кормандони Раёсати агентӣ дар вилояти Суғд шаҳрванди 43-сола — истиқоматкунандаи шаҳри Хуҷанд бо як бастаи полиэтиленӣ бо маводи фишурдашудаи рангаш ҷигарии дорои бӯйи махсус дастгир гардид. 
Тафтишоти пешакӣ муайян намуд, ки дастгиршуда пеш барои даст доштан дар муомилоти ғайриқонунии маводи нашъаовар суд шудааст, аммо ба озодӣ баромада, боз даст ба ҷиноят задааст. 
Дар натиҷаи андешидани  тадбирҳои иловагӣ ҳаммаслаки ӯ — сокини шаҳри Хуҷанд дастгир гардид, ки маводи нашъаоварро дар ҳудуди шаҳр паҳн менамуд. 
 Оид ба ҳар ду ҳодиса парвандаи ҷиноятӣ    бо моддаи  200  КҶ ҶТ оғоз шудааст.