« Солномаи оила» бахшида ба Соли оила

Темурмалик, 24.10.2015. (АМИТ  «Ховар»).- Бо ибтикори Раёсати сабти асноди ҳолати шаҳрвандии Вазорати адлияи Ҷумҳурии Тоҷикистон  байни шуъбаҳои сабти асноди ҳолати шаҳрвандии ноҳияи Темурмалик бахшида ба Соли оила озмуни «Солномаи оила» ҷараён дорад. Ин навбат  чорабинӣ дар ҷамоати деҳоти ба номи Саидмуъмин Раҳимов доир шуд.  Ҳайати ҳакамон аз намоишгоҳи ҳунарҳои мардумӣ, намоиши китобҳои бадеию сиёсӣ, ҳунари кадбонуии сокинон дидан карданд. Дар озмун оилаҳои намунавӣ иштирок намуда, ба ҷавонон аз рӯзгори хеш хикоят намуда, ҷавононро ба ҳамдигарфаҳмӣ, ҳурмати волидайн ва воло донистани арзишҳои миллию оилавӣ даъват карданд. 
Зикр гардид, ки чунин озмуну чорабиниҳо дар баланд бардоштани фарҳанги оиладорӣ мусоидати созгор дошта, масъулияти аъзои оиларо дар мустаҳкамии оила афзун менамоянд.