Таҷлили Рўзи забони давлатӣ дар Вазорати саноат

Душанбе, 06.10.2015 (АМИТ «Ховар»).-Дирӯз дар Вазорати саноат ва технологияҳои нави Тоҷикистон бахшида ба Рўзи забони давлатӣ ҷамъомад баргузор гардид.
Ба иттилои котиботи Вазорати саноат ва технологияҳои нави кишвар, вазир Шавкат Бобозода ҳозиринро бо Рўзи забони давлатии Ҷумҳурии Тоҷикистон  табрик намуда,  иброз дошт, ки  маҳз бо талошҳои пайгиронаи Президенти кишвар Ҷаноби Олӣ муҳтарам Эмомалӣ Раҳмон забони тоҷикӣ ҳамчун омили ваҳдат ва ифтихори миллӣ дар давлатдории навини мо дар мақоми забони давлатӣ қарор гирифт. Рушди забони давлатӣ, ки ҳамчун муқаддасоти миллӣ пазируфта шудааст, аз вазифаҳои бисёр муҳими давлат барои ҳифзи арзишҳои волои миллӣ дониста мешавад. Таърихи забони мо чандин навъи хату алифбо ва таълифи осори  бесобиқаю беҳамто дорад. Ин моро водор месозад, ки дар замони истиқлолияти давлатӣ арзишҳои миллиро ба наслҳои имрўзу фардои миллатамон муаррифӣ намоем.  
Инчунин дар ҷамъомад оид ба татбиқи қонуни забон кормандони вазорат андешаҳои худро баён намуданд.