Ташкили озмунҳо ба хотири пойдории оилаҳо

Тоҷикобод, 13.10.2015. (АМИТ «Ховар»).-  Бахши кор бо занон ва оилаи  ноҳияи Тоҷикобод бахшида ба Соли оила   ва ба фарҳанги бегонаю гурӯҳҳои ифротӣ нагаравидани  ҷавонон ва кам гардидани ҷудошавии оилаҳо дар якҷоягӣ бо  шуъбаи Сабти асноди ҳолати шаҳрвандӣ ва  занони фаъолу соҳибтаҷриба дар ҳамаи ҷамоатҳои шаҳраку деҳоти ноҳия корҳои фаҳмондадиҳӣ, вохӯрию ҷамъомадҳои судманд гузаронида истодаанд.  Соли ҷорӣ никоҳи  9 оила   бекор гардид, ки дар натиҷаи корҳои фаҳмондадиҳӣ 3 оилааш барқарор шуд. Инчунин нисбат ба соли гузашта  14 ҳолати ҷудо гардидани оилаҳо дар ноҳия  кам гардидааст.
 Вобаста ба Соли оила дар байни ҷамоатҳои деҳот озмуни «Хушдомани беҳтарин ва келини беҳтарин» гузаронида шуд, ки ғолибон бо ифтихорномаю  туҳфаҳои хотиравӣ қадрдонӣ шуданд.