Таъсиси Шӯрои байниидоравӣ оид ба ҳамоҳангсозӣ дар соҳаи туризм

Душанбе, 06.10.2015 (АМИТ «Ховар»).-Бо қарори Ҳукумати Ҷумҳурии Тоҷикистон Шӯрои байниидоравӣ оид ба ҳамоҳангсозии фаъолият дар соҳаи туризм таъсис ёфт, ки Шӯрои мазкур мақоми олии доимии машваратӣ-ҳамоҳангсоз дар соҳаи рушди туризм ба ҳисоб меравад. 
Ба иттилои Наврӯз Қурбонов, мутахассиси пешбари бахши таҳлилу иттилооти Кумитаи ҷавонон, варзиш ва сайёҳӣ, Шӯро барои таъмини ҳамкории мутақобилан судманд байни мақомоти иҷроияи ҳокимияти давлатӣ, субъекти хоҷагидори соҳаи туризм, шарикони рушд, ташкилоти ҷамъиятӣ, корхонаҳо, меҳмонхонаҳо ва ташкилоте, ки новобаста аз шакли моликияташон, ба пешниҳоди мол ва хизматрасонии туристӣ машғул мебошанд, таъсис дода шудааст.
Гуфта мешавад, барои ба танзим даровардани фаъолияти ширкатҳои туристӣ ва мусоидат намудан барои ҷалби туристон ба минтақаҳои ҷумҳурӣ, таъсиси Шӯрои мазкур ва дар доираи он муттаҳид намудани ташкилоти (ассоситасия ва шӯроҳо) ҷумҳуриявӣ ва минтақавии туристӣ мувофиқи мақсад аст. Шӯро дар назди Ҳукумати Ҷумҳурии Тоҷикистон фаъолият мекунад.