Ҳадаф- тарбияи ҷавонон дар руҳияи эҳтиром ба Ватан, қонун ва арзишҳои миллӣ

Хуҷанд,  17.11.2015. (АМИТ «Ховар).-Дирӯз дар шаҳри Қайроққум таҳти унвони “Пешгирии шаҳрвандон аз шомилшавӣ ба ҳизбу ҳаракатҳои ифротгаро” вохӯри доир гардид. Тавре  ки ба АМИТ “Ховар”  масъулин аз раёсати Хадамоти муҳоҷирати вилоятӣ  иттилоъ доданд, то имрӯз  чунин чорабиниҳо  дар шаҳрҳои Хуҷанд, Истиқлол, Қайроққум, Чкалов баргузор гардида, мутобиқ  ба нақшаи тасдиқгардида дар назар аст дар дигар шаҳру навоҳии вилоят  низ идома ёбанд.
Дар вохӯрӣ фаъолон, раисони ҷамоат ва кумитаи маҳаллаҳо, имом-хатибон, донишҷӯёни макотиби олӣ ва литсейҳои касбӣ-техникӣ, толибилмони синфҳои болоӣ, муҳоҷирони меҳнатӣ ва аъзои оилаи онҳо иштирок намуданд.
Намояндагони мақомот зикр карданд, ки ҳадафи вохӯриҳо- ин пешгирии шомилшавии ҷавонон ба гурӯҳҳои ҷиноятпеша,  аз қабили ҳизбу ҳаракатҳои террористию ифротгаро ва тамоилҳои бегонапарастӣ ва ба ин васила тарбия намудани ҷавонон дар руҳияи эҳтиром ба Ватан, қонун, арзишҳои миллӣ  ба ҳисоб меравад.