Афғонистон хостори сармоягузории ширкатҳои қазоқистонӣ шудааст

Душанбе,21.11.2015 (АМИТ «Ховар»).- Дар ҷараёни сафари Муҳаммад Ашраф Ғанӣ, Президенти  Афғонистон ба  Қазоқистон  чанд мувофиқаномаҳои ҳамкории байни ду кишвар ба имзо расидааст. Роҳбари давлати Афғонистон аз ширкатҳои қазоқистонӣ хостааст, то дар равандҳои зербиноӣ, бахусус роҳи оҳан дар Афғонистон сармоягузорӣ кунанд. 
Тибқи гузориши хабаргузории «Пажвок», дар ин дидор сарони  ду давлат  вазъияти кунунӣ ва ояндаи ҳамкории миёни Афғонистон ва Қазоқистонро мавриди баҳс қарор додаанд.
Тавре ки дар гузориш омадааст, Нурсултон Назарбоев, Президенти Қазоқистон бар густариши ҳамкории дуҷониба дар арсаҳои иқтисодӣ, сиёсӣ ва амнияти ҷаҳонӣ таъкид карда, аз Президенти  Афғонистон ба хотири ҳимоят аз номзадии ин кишвар барои узвияти ғайридоимӣ дар Шӯрои амнияти Созмони Милали Муттаҳид барои солҳои 2017-2018 қадрдонӣ намуд.
Ёдовар мешавем, ки Президенти  Афғонистон Муҳаммад Ашраф Ғанӣ таърихи 19-20 ноябри соли ҷорӣ бинобар даъвати Нурсултон Назарбоев аз  Қазоқистон дидори расмӣ ба амал оварда буд.