Ҳалокати ду пиёдагарди хурдсол дар садама

Душанбе, 10.11.2015. (АМИТ «Ховар).-9-уми ноябри соли равон ронандаи мошини тамғаи Hyundai Starex, сокини 34-солаи ноҳияи Мастчоҳ ҳангоми ҳаракат бо роҳи нақлиётгарди Чаноқ-Бӯстон дар ҳудуди шаҳраки Бӯстони ҳамин ноҳия, бехатарии ҳаракати роҳро таъмин карда натавониста,  писарбачаи 7-соларо пахш намудааст. Дар натиҷа хурдсол ҷароҳати вазнини ҷисмонӣ бардошта, дар беморхона ба ҳалокат расидааст. 
Ҳамчунин дар ин рӯз ронандаи мошини тамғаи Опел-Астра, сокини  43-солаи ноҳияи Истаравшан ҳангоми ҳаракат бо роҳи нақлиётгарди Душанбе-Хуҷанд дар ҳудуди деҳаи Ваҳдати ноҳияи Шаҳристон аз уҳдаи идораи воситаи нақлиёт набаромада, писарчаи 6-солаи сокини ҳамин деҳаро пахш намудааст. Дар натиҷа, кӯдаки хурдсол ҷароҳати вазнини ҷисмонӣ бардошта, дар беморхона ба ҳалокат расидааст.