Ҳаракати нақлиёт дар кӯчаи Бохтар 7 моҳ қатъ мегардад

Душанбе, 25.11.2015.(АМИТ «Ховар»).-Бо мақсади навсозии кӯчаи Бохтар ҳаракати воситаҳои нақлиёт аз кӯчаи Шоҳтемур то кӯчаи М. Миршакар шурӯъ аз фардо, 26 ноябри соли 2015 то  30 июни соли 2016, яъне ба муддати ҳафт моҳ қатъ мешавад.
Тибқи қарори  раиси шаҳри Душанбе Маҳмадсаид Убайдулллоев Бозрасии давлатии автомобилии Раёсати Вазорати корҳои дохилии Ҷумҳурии Тоҷикистон дар шаҳри Душанбе ва дигар сохторҳои шаҳрӣ муваззаф гардидаанд, ки дар ин муддат  самти ҳаракати нақлиёти мусофирбарро, ки аз чорроҳаи кӯчаҳои Бохтар — Ф.Ниёзӣ мегузарад, ба кӯчаҳои ҳамшафат муайян намуда, дар нақшаҳои хатсайри воситаҳои нақлиёти мусофирбар тағйирот ворид намоянд.
Бояд тазаккур дод, ки зимни навсозии кӯчаи Бохтари пойтахт бархе аз дарахтони кӯчаи мазкур баратараф шуда, ба ҷои онҳо ниҳолҳои нав шинонида мешаванд. Ҳезуми дарахтони бартарафшаванда дар ҳаҷми 108 м3 ба мувозинати ноҳияи Исмоили Сомонӣ гузаронида мешавад.