Бадахшон: ифтихор аз Парчами миллӣ

Душанбе, 25.11.2015. (АМИТ «Ховар»).- Дар маркази вилояти Бадахшон   бахшида ба Рӯзи Парчами миллӣ   роҳпаймоӣ баргузор гардид. Дар ҷамъомад аз  кӯдакони   марказҳои  инкишофи  барвақтӣ сар карда, то ҷавонону  кормандони  идораҳои давлативу ғайридавлатӣ, ҳамагон бо Парчами миллӣ ва  дигар овезаҳову  рамзҳои давлатӣ дар  роҳпаймоӣ  иштирок намуданд.  Роҳпаймоӣ то майдони  Исмоили Сомонии  шаҳри Хоруғ  давом ёфта, дар он    роҳбарияти  вилоят  ҷамъомадагонро табрик гуфта, аз таърихи  Парчами миллӣ  ёдоварӣ шуданд ва бобати  бузургии ин дирафши серангаи  муқаддас сухан карданд.   Зикр гардид, ки ҳамаи ин ободкориву шоҳкориҳои   кишвари   тоҷикон дар зери  ин  парчами  бузург ва неруманд сурат гирифтааст ва тавонистааст, кулли тоҷикони дунёро ба ҳам оварад. Ҳамчунин гуфта шуд, ки имрӯз ҳар як  тоҷики рӯи замин, новобаста аз он, ки  дар  кадом гӯшаю канори дунё иқомат дорад, агар хештаншиносу  миллатшинос бошад,  бояд ки   бо ин парчами  муқаддас ифтихор дошта бошад ва   бо миллати   сарбаланди худ  онро  ҳифз намояд.  
Дар баробари дигар  чорабиниву озмунҳо, барномаи  фарҳангӣ низ пешкаши ҷамъомадагон гардонида шуд.