БМТ: Таваррум дар сатҳи муътадил қарор дорад

Душанбе, 20.11.2015. (АМИТ «Ховар»).- Тавре ки таҳлили маълумоти омори расмӣ нишон дод, сатҳи таваррум дар кишвар нисбатан устувории худро нигоҳ дошта, дар интиҳои моҳи октябри соли ҷорӣ 0,5 фоизро ташкил намуд. Нишондиҳандаи мазкур дар моҳҳои январ-октябри соли равон 4,1 фоизро ташкил дод, ки нисбат ба ҳамин давраи соли гузашта 2,0 банди фоизӣ камтар аст. Таваррум дар зарфи 12 моҳ ба 5,4 фоиз баробар шуда, дар қиёс ба ҳамин давраи соли гузашта 1,3 банди фоизӣ пасттар мебошад.
Яке аз фишангҳои асосии сиёсати пулию қарзӣ — меъёри бозтамвили Бонки миллии Тоҷикистон чун моҳҳои гузаштаи соли равон бе тағйир дар сатҳи 8,0 фоиз қарор дорад.
Дар ин бора аз Хадамоти матбуоти БМТ хабар доданд.