Боздиди намояндагони Чин аз Академияи ВКД ҶТ

Душанбе, 5. 11. 2015. (АМИТ «Ховар»).- 3 ноябр дар Академияи ВКД Ҷумҳурии Тоҷикистон бо намояндагони Академияи (Донишгоҳи) Вазорати амнияти ҷамъиятии Ҷумҳурии Мардумии Чин, ки ба ин даргоҳи илм ташриф оварда буданд, вохӯрӣ баргузор гардид. 
Дар чорабинии мазкур сардори Академияи ВКД, номзади илмҳои ҳуқуқ, полковники милитсия Файзалӣ Шарифзода ва муовини директори Академияи (Донишгоҳи) Вазорати амнияти ҷамъиятии Ҷумҳурии Мардумии Чин, профессор, полковники политсия Ли Тсян Хэ сухан карданд. 
Зимни вохӯрӣ масъалаҳои ҳамкории минбаъда миёни Академияи (Донишгоҳи) Вазорати амнияти ҷамъиятии Ҷумҳурии Мардумии Чин  ва Академияи Вазорати корҳои дохилии Тоҷикистон дар самти мубодилаи таҷриба дар самти илм, таълиму тарбия сухан рафт. 
Меҳмонон оид ба фаъолияти донишгоҳи худ, пешрафту дастовардҳо ва тарзу усули беҳтари таълиму тарбияи он маълумот доданд. 
Намояндагони донишгоҳи мазкур аз ҷараёни таълимии факултети № 1-и Академияи ВКД, шароити ба таҳсилу омодагии ҷисмонию ҳарбии курсантон шинос шуданд. 
Дар фарҷоми вохӯрӣ ба меҳмонон аз номи Академияи ВКД Ҷумҳурии Тоҷикистон туҳфаҳои хотиравӣ супорида шуданд.