Боздошти хизматчии ҳарбӣ бо маводи нашъаовар

Душанбе  3.11.2015  (АМИТ  «Ховар»)- Хизматчии ҳарбии яке аз сохторҳои қудратии ҷумҳурӣ бо гумони даст доштан дар муомилоти ғайриқонунии маводи нашъаовар дастгир шуд.
Ин нафар аз ҷониби кормандони Раёсати Агентии назорати маводи нашъаовари назди Президенти ҶТ дар вилояти Суғд дар ҳудуди шаҳри Хуҷанд боздошт ва аз ӯ сумкаи полиэтиленӣ бо 2,5 кг ҳашиш мусодира гардид. Кормандони фаврӣ ҳаммаслаки ӯ — донишҷӯи курси якуми литсеи шаҳриро низ дастгир намуданд.
Нисбат ба ин нафарон парвандаи ҷиноӣ боз шуда, тафтиш идома дорад.
Инчунин тибқи иттилои Агентии назорати маводи нашъаовари кишвар, дар чорчӯбаи гузаронидани амалиёти “Кӯкнор-2015” дар ноҳияи Мастчоҳ зиёда аз 3 ҳазор бех ниҳоли бангдонаи худрӯй ошкор гардид, ки ҳамаи он дар ҳузури комиссия нобуд карда шуданд.