Буҷети маҳаллии шаҳри Роғун барзиёд иҷро гардид

Роғун, 9.11.2015. (АМИТ «Ховар»).- Дар нўҳ моҳи соли равон буҷети маҳаллии шаҳри Роғун, ки қисми даромадаш мутобиқи нақша 22 млн. 272,5 ҳазор сомониро ташкил медод, ба маблағи 25 млн. 221,4 ҳазор сомонӣ иҷро шуд, ки ин нишондод 113%-ро ташкил медиҳад.
Даромади буҷети ҷумҳуриявӣ мутобиқи нақша 20 млн. 346,9 ҳазор сомониро ташкил медод, ки ин нишондод ба маблағи 21 млн.  640,6 ҳазор сомонӣ ҷамъоварӣ шуда, иҷрои он 106%-ро ташкил медиҳад. 
Ҷамъи умумии даромадҳои буҷетҳои ҷумҳуриявӣ ва маҳаллӣ, ки тибқи нақша 42 млн. 621,2 ҳазор сомониро ташкил медод, ба миқдори 46 млн. 863,7 ҳазор сомонӣ ҷамъоварӣ шуд, ки нисбат ба ҳамин давраи соли гузашта 16 млн. 505,1 ҳазор сомонӣ зиёд аст.
Сабаби асосии дар сатҳи паст қарор доштани иҷрои хароҷоти буҷет ин маҳдуд намудани ҳар гуна хароҷоти бесамар ва дуюмдараҷа  мебошад.
Асоси иҷро ва ғанигардонии буҷет- ин, албатта, ҷамъоварии андоз ва мавриди андозбандӣ қарор додани субъектҳои хоҷагидор ба шумор меравад. Тибқи нақшаи тасдиқшуда ҳамаи намудҳои андозу даромадҳо, ба ҷойи 75 млн. 738,5 ҳазор сомонӣ дар ҳаҷми 83 млн. 934,4 ҳазор сомонӣ ҷамъоварӣ шудааст, ки ин нишондод 110 %-и иҷрои нақшаро ташкил медиҳад.