Чорабиниҳои оммавӣ ба ифтихори Рӯзи Парчам дар Хуҷанд

Хуҷанд,  18.11.2015. (АМИТ «Ховар).-Дар маркази вилояти Суғд- шаҳри Хуҷанд баҳри сазовор ва дар сатҳи баланд таҷлил намудани Рӯзи Парчами Ҷумҳурии Тоҷикистон корҳои муайяни ташкилӣ ҷараён доранд.  Аз ҷумла, тибқи нақшаи чорабиниҳои мақомоти иҷроияи ҳокимияти давлатӣ  дар қаламрави шаҳр бахшида ба ин рӯз чорабиниҳои оммавӣ-сиёсӣ ва фарҳангӣ доир гашта истодаанд. 
Тавре ки ба АМИТ “Ховар” масъулин аз бахши идеологияи мақомоти шаҳр иттилоъ доданд,  дар доираи ҳафтаи таҷлили  Рӯзи Парчам дар ҳамаи муассисаҳои таълимию фарҳангӣ, хосатан мактабҳои олӣ,  санъат ва касбию техники бо мақсади эҳтиром  ва қадршиносӣ ба муқаддасоти миллӣ   чорабиниҳои мухталиф, чун вохӯриҳо, мизҳои мудаввар ва конфронсҳои илмию назариявӣ  таҳти унвони “Парчамат парафшон бод, Тоҷикистон”  ҷараён доранд. 
Ҳамчунин барои насб кардани парчам ва шиору   овезаҳо дар кӯчаву хиёбонҳои шаҳру   биноҳои маъмурӣ ва баргузор намудани чорабиниҳои идона дар маркази шаҳр бо иштироки фаъолон, сокинону меҳмонон ва неруи созандаи кишвар- ҷавонон корҳои амалӣ ба анҷом расида истодаанд.