Дар Исфара нашъаҷаллоб дастгир гардид

Душанбе, 17.11.2015. (АМИТ «Ховар).- Аз тарафи кормандони Раёсати Агентии назорати маводи нашъаовари назди Президенти ҶТ дар вилояти Суғд дар ҳудуди шаҳри Исфара бо гумони даст доштан дар муомилоти ғайриқонунии маводи нашъаовар сокини деҳаи Кӯлқанд дастгир шуд, ки аз ӯ бастаи полиэтиленӣ бо маводи ҷигариранг мусодира гардид. 
Мутобиқи хулосаи Шуъбаи ташхиси криминалистӣ маводи мусодирашуда навъи ҳашиш мебошад.   
Дар натиҷаи андешидани тадбирҳои иловагӣ ҳамиштирокдори ҷинояти мазкур — сокини шаҳри Душанбе дастгир гардид, ки аз ӯ маводи нашъаовар харидорӣ шудааст. 
Ҳоло тафтишот ҳамиштирокдорони боқимондаи ҷинояти мазкурро муайян намуда истодааст. 
Аз рӯи ҳодисаи мазкур аз тарафи Шуъбаи тафтишоти Раёсати агентӣ парвандаи ҷиноӣ оғоз гардидааст ва тафтиш давом дорад.