Даъвати ҷавонон ба китобхона ва китобхонӣ

Душанбе, 2.11.2015. (АМИТ «Ховар»).-Дар толори “Ошёни булбулон”- и Китобхонаи миллии Тоҷикистон бахшида ба рӯзи Конститутсия таҳти унвони «Биёед, ба китобхона равем» чорабинии фарҳангӣ доир гардид. 
Директори  Китобхона Сайфиддин Назарзода оид ба таърихи Сарқонуни кишвар ва моҳияти он сухан гуфта,  созандагию ободкориро маҳсули сулҳу субот ва волоияти қонунҳо, ки аз сарқонун сарчашма мегиранд, маънидод намуд.
Зикр шуд, ки Конститутсияи ҶТ аз ғояҳои  башардўстона иборат буда,  инъикоскунандаи суннатҳои ғании халқи тоҷик ба ҳисоб меравад ва аз барҷастатарин   намунаҳои  фарҳанги ниёгонамон сарчашма мегирад.
Директори китобхона  таърихи китобхона ва  имкониятҳои онро муаррифӣ намуда, ҷавонон ва ҳаводорони илму донишро барои китобхонӣ ба китобхона даъват намуд. 
 Бояд гуфт, ки  ҳадаф аз баргузории чорабинии мазкур тарғиб ва ҷалби донишҷўён ба китобу китобхона мебошад.
Дар чорабинӣ саҳначаи “Китоб-дӯсти беҳтарини инсон аст” аз ҷониби хонандагони Литсейи №2 шаҳри Душанбе  намоиш дода шуд, ки ба ҳозирин ғизои маънавӣ бахшид.