Фаромадани сангпораҳо сабаби ба ҷарӣ афтодани мошин гардид

Душанбе, 16.11.2015. (АМИТ «Ховар»).-15-уми ноябр дар роҳи нақлиётгарди Айнӣ-Панҷакент ҳангоми ҳаракати ронандаи мошини тамғаи “БМВ”, сокини 38-солаи н. Айнӣ дар ҳудуди деҳаи Навдонаки н.Айнӣ, ногаҳон аз кӯҳ санг афтида, ба болои мошини мазкур афтидааст. Дар натиҷа мусофири мошин- сокини 55-солаи ҳамин ноҳия ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. 
Ҳамчунин дар ин рӯз ҳангоми ҳаракат бо роҳи нақлиётгарди Душанбе-Чаноқ, дар ҳудуди ҷамоати деҳоти Хушекати ноҳияи Айнӣ ба мошини тамғаи “Хундай-Старекс”, ронандааш сокини 32-солаи ноҳияи Мастчоҳ аз кӯҳ сангпораҳо афтода, ба мошин бархӯрдаанд ва мошин ба ҷуқурии 300 метр чаппа шудааст. Ронандаи мошин ва мусофирони он: марди 68-сола, зани 58-сола ва духтарчаи 6-сола, сокинони ноҳияи Мастчоҳ ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд. Духтарчаи 2-солаи сокини ҳамин ноҳия ҷароҳати ҷисмонӣ бардошта, дар беморхона бистарӣ мебошад.