Конибодом: маҳфили “Оилаи намунавӣ”

Конибодом, 16.11.2015 (АМИТ «Ховар»).-Дирӯз вобаста ба эълони “Соли оила” дар шаҳри Конибодом таҳти унвони  “Оилаи намунавӣ” бо иштироки оилаҳои беҳтарину намунавӣ, фаъолон, бонувони рӯзгордидаву соҳибҳунар ва оилаҳои ҷавони дорои касбҳои гуногун озмун-маҳфили судманд доир гардид. Дар ин бора ба АМИТ “Ховар” масъулин аз маркази матбуотии мақомоти шаҳри Конибодом иттилоъ доданд.  Ҳадаф аз баргузории чорабинӣ- ин пешгирии вайроншавии оилаҳо, алалхусус оилаҳои ҷавон, барҳам задани никоҳи хешутаборӣ, омода намудани ҷавонон ба ҳаёти оилавӣ ва  тарғиби ҳаёти ибратбахши оилаҳои намунавӣ буд.  
Дар чорабинӣ 6 оилаи беҳтарину намунавӣ гули сари сабади маҳфил интихоб гардида, оид ба сирри хушбахтии оилавӣ ва тарбияи фарзандон суҳбатҳои гарму самимӣ карданд.
Оилаҳо аз рӯйи шартҳои озмун оид ба ҳаёту рӯзгори оилавӣ наворҳои муаррифӣ, сурат-слайдҳо аз лаҳзаҳои хотирмони кориву оиладорӣ, саҳначаҳо аз рӯзгори оилавӣ пешкаш намуда, ҳамчунин ба саволҳои ҳакамон оид ба оиладорӣ посух гуфтанд.
Дар фарҷоми маҳфил, аз ҷониби аъзои ҳакамон ба оилаҳо аз рӯйи истеъдоду маҳораташон унвони «Оилаи эҳёгари анъанаҳои миллӣ», «Оилаи эҷодкор», «Оилаи ҳунарманд» , «Оилаи ҷавони намунавӣ»  ва туҳфаҳои хотиравии мақомоти иҷроияи ҳокимияти давлатии шаҳр супорида шуданд.