Мақсад: пешгирии ҳуқуқвайронкунии ҷавонон

Душанбе, 18.11.2015. (АМИТ «Ховар»).-Бо мақсади пешгирии шомилшавии ҷавонон ба ҳизбу ҳаракатҳо ва равияҳои ғайриқонунии экстремистӣ ва ҷинояткорӣ дар байни онҳо 17 ноябр вохӯрии устодону кормандон ва донишҷӯёни Донишкадаи молия ва иқтисоди Тоҷикистон  бо намояндагони мақомоти ҳифзи ҳуқуқ, кормандони ШВКД-1 ноҳияи Синои шаҳри Душанбе доир гардид. 
Тавре ки аз ДМИТ хабар доданд, дар вохӯрӣ сардори ШВКД-1-и ноҳияи Сино полковники милитсия Раҳматулло Нуъмонзода, сардори ШВКД-1 подполковники милитсия Асомуддин Абдуллозода ва ёрдамчии сардори ШВКД-1-и ноҳияи Сино майори милитсия Нарзулло Алимов иштирок намуданд.
 Ректори донишкада Ашурбой Солеҳзода ин қабил вохӯриҳоро муҳим ва саривақтӣ арзёбӣ карда, зикр намуд, ки Раёсати донишкада барои барқарор намудани робитаи доимӣ бо мақомоти қудратӣ ва баланд бардоштани маърифати зеҳниву маънавии наврасону ҷавонон, пешгирӣ намудани сатҳи ҷинояткорию ҳуқуқвайронкунӣ саъю кӯшиш ба харҷ медиҳад.
Сардори ШВКД-1-и ноҳияи Сино полковники милитсия Раҳматулло Нумонзода изҳор дошт, ки ҷавонон, бахусус донишҷӯён имрӯзҳо аз даврони истиқлолият ва неъматҳои фаровони сулҳу ваҳдат шукргузорӣ намуда, барои таҳсили хуб ва дар оянда мутахассиси варзида гардидан талош намоянд. Вазъи ҷаҳони имрӯза аз ҳар кадоми мо зиракии сиёсӣ ва идроки баландро талаб менамояд. Мо бояд ба оромиву суботи кишвар ва ваҳдати миллӣ шукрона намоем. Бо шарофати истиқлолияти давлатии кишвар ва тинҷию оромӣ ҳамасола барои дастгирию ғамхорӣ аз тарафи ҳукумати мамлакат ба ҷавонон имтиёзҳои зиёд пешкаш мегарданд.