Масоҳати шолизори Панҷакент васеъ мешавад

Хуҷанд, 13.11.15. (АМИТ «Ховар»). — Вақтҳои  наздиктарин  дар  ноҳияи  Панҷакенти  вилояти  Суғд масоҳати шолизор бо  истифода  аз заминҳои  корамнашуда васеъ  мегардад. Барои  ин  таҳкимкории  соҳилҳои дарёи  Зарафшон  роҳандозӣ мешавад.
Тавре  ки  дар раёсати   кишоварзии вилояти  Суғд ба  АМИТ «Ховар»  хабар  доданд,  алҳол  дар  ноҳияи  Панҷакент  беш  7  намуди  шолӣ   парвариш  мешавад. Имсол  деҳқонони  ноҳия аз  ҳар  гектари  шолизор   ба  ҳисоби  миёна  беш  аз  70  сентнерӣ  ҳосил гирифтанд. 
Чанде  пеш  раиси  вилоят  Абдураҳмон  Қодирӣ ба  ноҳияи   Панҷакент  сафар  карда,  зимни  вохӯриаш бо шоликорону  деҳқонон  таваҷҷуҳи  шоликоронро  ба васеъ  намудани  масоҳати  шолизор аз  ҳисоби  таҳкимкории соҳилҳои   дарёи  Зарафшон ҷалб  намуд. Барои иҷрои  ин  вазифа  ба шахсони  масъул  дастур  дода шуд, ки корҳои  зикршударо  то  охири  моҳи  марти  соли  2016  анҷом  диҳанд. 
Дар оянда  ин ташаббус   густариш  ёфта, ҳазорҳо нафар  шоликорон  бо   киштзор таъмин  мегарданд.