Нақшаи бунёди шаҳраки нав дар Мастчоҳ

Душанбе, 18.11.2015. (АМИТ «Ховар»).-Дар ҳудуди ноҳияи Мастчоҳ шаҳраки нав бо номи Меҳробод бунёд мешавад. Бо ин мақсад ба эҳтиёҷмандоне, ки дар навбати замини наздиҳавлигӣ истода буданд, аз мавзеи ҷамоати деҳоти Суғдиён ҷой барои бунёди манзилҳои истиқоматӣ ҷудо шудааст.
Шаҳраки мазкур ҳамрадиф бо шаҳракҳои Сайҳуну Моҳпарӣ ва Баҳористон дар доираи иқдоми ташкили мавзеъҳои нави истиқоматии замонавӣ амалӣ мешавад, ки дар асоси дастуру супоришҳои Сарвари давлат Эмомалӣ Раҳмон роҳандозӣ гардидааст.
Бо қарори Ҳукумати ҷумҳурӣ дар масоҳати 330 гектар маҷмӯан барои 2700 эҳтиёҷманд ин ҷо замин дода шудааст, ки  асосан сокинони ҷамоатҳои деҳоти Мастчоҳ, Оббурдон, Палдорак ва шаҳраки Бӯстон мебошанд. Ҳоло лоиҳаи шаҳраки нав омода шуда, тибқи нақша шаҳрак бо инфрасохтори замонавӣ фаро гирифта мешавад ва дар он се мактаб, се бунгоҳи тиббӣ, як беморхона, се кӯдакистон, марказҳои ҷамъиятӣ, бозор ва дигар иншооти иҷтимоӣ бунёд мешаванд.