Оромии мардумро халалдор насозед, вагарна муҷозот мешавед!

Ноябрь 4, 2015 08:55

Душанбе, 04.11.2015.(АМИТ «Ховар»).-Минбаъд нисбат ба шахсони воқеию ҳуқуқӣ ва мансабдороне, ки ба сохтмони иморату хонаҳо  машғуланду бо садои баланди техникаю таҷҳизоти сохтмонӣ аз соати 23:00 -и шаб то соати 6:00 субҳ оромии мардумро халалдор менамоянд,  муҷозоти маъмурӣ ҷорӣ мешавад. Дар иртибот ба ин 4 ноябр вакилони палатаи поёнии Парлумони  кишвар ба Кодекси ҳуқуқвайронкунии  маъмурии Ҷумҳурии Тоҷикистон тағйиру илова ворид намуданд.           
Бахтовар Сафаров-вакили Маҷлиси намояндагон зимни тавзеҳи масъалаи мазкур гуфт, ки тибқи тағийру иловаҳо ба моддаи 462 -и Кодекси мазкур нисбат ба шахсони мансабдор, ки иморат бунёд менамоянду шабонгоҳ оромии мардумро бо садои баланди техникаю таҷҳизоти сохтмонӣ халалдор месозанд, аз 5 то 7 нишондиҳанда барои ҳисобот ё худ ба маблағи аз 200 то 280 сомонӣ ҷарима ситонида мешавад. Барои шахсони воқеӣ ё худ шаҳрвандон аз  2 то 3 нишондиҳанда барои ҳисобот ё худ 80 -120 сомонӣ қонунгузорӣ ҷарима муайян намудааст. Ин нишондод барои шахсони ҳуқуқӣ — ширкату корхонаҳои сохтмонӣ аз 10 то 20 нишондиҳанда барои ҳисобот  ё 400-800 сомонӣ муҷозоти маъмурӣ муайян гардидааст. 
Бахтовар Сафаров афзуд, ки дар сурати такрор ёфтани қонуншиканӣ андозаи ҷаримаи маъмурӣ нисбат ба афроди мазкур баланд бардошта шуда, барои шахсони воқеӣ-шаҳрвандон  аз 5 то 7 нишондиҳанда барои ҳисобот ё  200-280 сомонӣ, барои мансабдорон 10-15 нишондиҳанда барои ҳисобот- 400-600 сомонӣ ва барои  шахсони ҳуқуқӣ ё корхонаю ширкатҳои сохтмонӣ аз 20 то 30 нишондиҳанда барои ҳисобот, ки баробар ба 800 -1200 сомонист, муқаррар мешавад..

Ноябрь 4, 2015 08:55

Хабарҳои дигари ин бахш

Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 16 дараҷа гарм мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Имрӯз дар водиҳои Тоҷикистон ҳаво 18 дараҷа гарм мешавад
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд