Панҷ ширкати сайёҳӣ соҳиби иҷозатнома шуд

Душанбе, 26.11.2015. (АМИТ «Ховар»). -Имрӯз, 26-уми ноябр Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади рушди туризми дохилӣ ва ҷалби сайёҳони хориҷӣ ба панҷ ширкати нави сайёҳӣ, аз ҷумла «Манум», «Ориёӣ», «Осоишгоҳи кишоварзӣ», «Аҷам-тур» ва «Сари Хосор»  иҷозатномаи фаъолияти туристиро супорид, ки ин метавонад ба таъсиси ҷойҳои нави корӣ, беҳтар кардани сифати хизматрасонӣ ва муаррифии имкониятҳои сайёҳии Тоҷикистон ҳамчун кишвари осоишта дар арсаи байналмилалӣ мусоидат намояд.
Бояд зикр намуд, ки дар замони муосир соҳаи сайёҳӣ аз бахшҳои муҳими иқтисодӣ, иҷтимоӣ ва фарҳангӣ маҳсуб шуда, ба рушди иқтисодиёти мамлакат ва равобити судманди байни кишварҳои мухталиф мусоидат менамояд. Вобаста ба ин ва бо назардошти захираҳои бойи табиӣ ва таърихию фарҳангии кишвар, Ҷумҳурии Тоҷикистон соҳаи сайёҳиро аз самтҳои афзалиятноки сиёсати иқтисодии Тоҷикистон эълон намудааст.