Парлумон ба қонуни мубориза бар зидди терроризм илова ворид намуд

Душанбе, 25.11.2015.(АМИТ «Ховар»).- Ҷумҳурии  Тоҷикистон муборизаро бар зидди терроризм пурзӯр мегардонад. 25 ноябр вакилони палатаи поёнии Парлумони Тоҷикистон пешниҳоди Ҳукумати Ҷумҳурии Тоҷикистонро дар бораи ворид намудани илова ба лоиҳаи Қонуни Ҷумҳурии Тоҷикистон «Дар бораи мубориза бар зидди терроризм» баррасӣ ва қабул намуданд. 
Лоиҳаи қонуни мазкур бо мақсади минбаъд дар қаламрави кишвар ва минтақаҳои ҷудогонаи он бо дархости субъекти асосии бевосита бар зидди терроризм муборизабаранда муваққатан боздоштани хизматрасонии алоқаи барқӣ ва истифодаи воситаҳои вобаста ба он дар минтақаи гузаронидани  амалиёти зиддитеррористӣ  таҳия гардидааст. 
Хайрулло Суфиев — узви кумитаи Маҷлиси намояндагон оид ба тартиботи ҳуқуқӣ, мудофиа ва амният зимни ташреҳи масъалаи мазкур гуфт, ки  ворид намудани илова ба лоиҳаи Қонуни Ҷумҳурии Тоҷикистон «Дар бораи мубориза бар зидди терроризм» имкон медиҳад, ки минбаъд дар Ҷумҳурии Тоҷикистон то ба анҷом расонидани амалиёти зиддитеррористӣ дар минтақаи гузаронидани он фазои иттилоотии қаламрави кишвар ё  минтақаҳои ҷудогона халалдор нагарданд.