Парлумон ба соҳибкорон сабукӣ дод

            Душанбе, 26.11.2015.(АМИТ «Ховар»).-Вакилони палатаи поёнии Парлумони кишвар пешниҳоди Ҳукумати ҷумҳуриро дар мавриди ворид намудани тағйирот ба  лоиҳаи Қонуни Ҷумҳурии Тоҷикистон «Дар бораи низоми иҷозатдиҳӣ»  баррасӣ ва қабул намуданд.  
            Толиббек Бухориев-узви кумитаи Маҷлиси намояндагон оид ба қонунгузорӣ ва ҳуқуқи инсон зарурати ворид намудани тағйирот ба лоиҳаи қонуни мазкурро ба ихтисор намудани  теъдоди ҳуҷҷатҳои  иҷозатдиҳӣ барои рушди фаъолияти соҳибкорӣ ва тавассути  низоми электронӣ  ба расмият даровардани беш аз  30%  ҳуҷҷати иҷозатдиҳӣ рабт дод. Мавсуф зикр кард, ки аз қонуни амалкунанда панҷ ҳуҷҷати  иҷозатдиҳӣ, ба мисли шаҳодатномаи тахассуси аудити экологӣ,  шаҳодатномаи тахассуси аудитӣ,  мувофиқакунии ташкили корҳо барои ченкунӣ ва банаворгирии зери пулҳо ва соҳили дарёҳо,  мувофиқакунии рондани чорво ба воситаи  роҳҳои мошингард, кушодани роҳҳои мошингарди муассисавӣ ва хусусӣ барои истифодаи умумӣ аз номгӯи ҳуҷҷатҳои иҷозатдиҳӣ хориҷ шуданд. 
              Толиббек Бухориев афзуд, ки дар маҷмӯъ дар ҷумҳурӣ 86 номгӯй ҳуҷҷатҳои иҷозатдиҳӣ вуҷуд доранд, ки дар оянда бо мақсади рушди соҳибкорӣ дар кишвар зарурати батадриҷ коҳиш додани онҳо дар назар аст.