«Рўзи Парчами давлатӣ муборак!»-ҳамоиши гумрукчиён

Душанбе, 19.11.2015. (АМИТ «Ховар»).-Рўзи Парчами давлатии Ҷумҳурии Тоҷикистон ҳар сол 24-уми ноябр ҳамчун иди миллӣ бо ифтихор аз давлату  давлатдорӣ ва соҳибистиқлоливу соҳибихтиёрӣ ҷашн гирифта мешавад.
 Ҳайати шахсии кормандони Раёсати минтақавии гумрук дар вилояти Суғд дар арафаи таҷлили рўзи  Парчами давлатии Ҷумҳурии Тоҷикистон  бо  устоди Донишгоҳи давлатии  Хуҷанд  ба номи академик Бобоҷон Ғафуров, дотсенти кафедраи таърих ва ҳуқуқ   Сафар Эркаев вохўрӣ доир намуданд.
 Дар ҷамъомад зикр гардид, ки эҳтироми Парчами давлатӣ ва расидан ба қадри он аз ҷумлаи вазифаҳои ифтихорӣ ва қарзи шаҳрвандии аҳли ҷомеа ба ҳисоб меравад ва зарур аст, ки ҳисси ифтихор аз парафшонии он дар сиришту фитрати ҳар як шаҳрванди ватандўсту меҳанпараст ҳамеша побарҷо бошад.
Парчами давлатии соҳибистиқлоли Тоҷикистон ҳамчун таҷассумгари умеду ормонҳои миллат ҳамеша парафшон хоҳад буд ва зери сояи он мо дар роҳи ободиву шукуфоии ватани азизамон ба дастовардҳои назаррас ноил хоҳем гашт.