Сарқонун-дастури зиндагӣ барои миллати тамаддунсози тоҷик

Душанбе, 4.11.2015. (АМИТ «Ховар»).-Имрўз дар толори Хадамоти гумруки назди Ҳукумати Ҷумҳурии Тоҷикистон бахшида ба таҷлили  21-умин солгарди  Конститутсияи  (Сарқонуни) Ҷумҳурии Тоҷикистон бо иштироки Ваколатдор оид ба ҳуқуқи инсон дар Ҷумҳурии Тоҷикистон  Зариф  Ализода,  роҳбарият ва ҳайати шахсии мақомоти гумрук  ҷамъомад   баргузор гардид.
Дар вохўрӣ зикр гардид, ки Конститутсияи (Сарқонуни) Ҷумҳурии Тоҷикистон  арзиши олӣ доштани инсон, ҳуқуқ ва озодиҳои онро яке аз нишонаҳои  асосии  давлати  демократӣ меҳисобад.
 Эълон доштани бунёди давлати соҳибихтиёр, демократӣ, ҳуқукбунёд, дунявӣ  ва  иҷтимоӣ, ки дар моддаи якуми Конститутсияи  Ҷумҳурии Тоҷикистон омадааст, яке аз  нишонаҳои асосии  чунин  давлат арзиши олӣ эътироф  гардидани инсон  ва ҳуқуқу озодиҳои он мебошад.
-Мо,  кормандони мақомоти гумрук бо  итминони комил ифтихор аз он  дорем, ки  бо қабули  Конститутсияи Тоҷикистон  соҳибистиқлолии худро  дар фазои  худшиносиву худогоҳӣ ва  ваҳдати миллӣ,  тинҷиву оромӣ ва якпорчагии  давлати соҳибистиқлоламон таҷлил менамоем,-зикр шуд дар ҷамъомад.
Мо бояд  саъю кўшиш кунем, ки ин санади  тақдирсозро  чун  муқаддасоти миллӣ ва дастури зиндагии наслҳои имрўзу фардои миллати тамаддунсози тоҷик эҳтиром  ва тибқи муқаррароти он зиндагӣ ва фаъолият намоем.