“Сулҳ аз мо оғоз меёбад”- мусобиқаи варзишӣ

Душанбе, 25.11.2015. (АМИТ «Ховар»).- Бахшида  ба Рӯзи Парчами миллӣ дар шаҳру ноҳияҳои шимоли кишвар чорабиниҳои варзишӣ доир гардиданд.  24 ноябр  дар амфитеатри Қасри Арбоби ноҳияи Бобоҷон Ғафуров мусобиқаи кушоди ноҳиявӣ оид ба гӯштини камарбандӣ баргузор шуд. 
Тавре ки ба АМИТ “Ховар” аз Раёсати ҷавонон, варзиш  ва сайёҳии вилояти Суғд иттилоъ доданд,  яке аз мақсадҳои баргузории чорабинии мазкур- ин пеш аз ҳама, мустаҳкамсозии алоқаи дӯстӣ, тарғиби  варзишу солимӣ ва ҷалби наврасону ҷавонон ба тарзи ҳаёти солим буда, он  бо ташаббуси Раёсати ҷавонон, варзиш ва сайеҳии вилоят ва ноҳияи Бобоҷон Ғафуров, инчунин ассотсиасияи зиёиёни илмӣ-техникии Ҷумҳурии Тоҷикистон баргузор гардид.  
Дар мусобиқаи мазкур, ки дар доираи лоиҳаи “Сулҳ аз мо оғоз меёбад” доир шуд, беш аз 240 гӯштингир аз шаҳру ноҳияҳои вилояти Суғди ҶТ  ва ноҳияҳои ҳамсарҳади Ҷумҳурии Қирғизистон дар вазнҳои аз 60 то зиёда аз 100 кг  байни худ рақобат карданд. 
Ғолибону ҷоизадорони мусобиқа бо медалу ифтихорнома ва туҳфаҳои хотиравӣ қадрдонӣ шуданд.