Тақсими ниҳолҳо ба сокинони шаҳраки навбунёди Раҳмонободи Шуғнон

Душанбе, 16.11.2015. (АМИТ «Ховар»).-Бо супориши Сарвари давлат  ба сокинони ВМКБ, ки  аз офати табиии  тобистони имсола зарар дидаанд ва дар ҷойҳои нав иқомат доранд,  кучати  ниҳолҳо  ройгон тақсим  мешаванд. Бо ин мақсад 1200 бех ниҳоли  мевадиҳанда, ки  даҳ намудро  ташкил менамоянд,   аз ҷониби Академияи  илмҳои кишоварзии Ҷумҳурии Тоҷикистон  ба ВМКБ интиқол дода шуд. 
Сардори Кумитаи  ҳифзи табиати  вилояти Бадахшон Мулкамон Назаралиев  гуфт, ки  кучати ниҳолҳои баҳрадор  дар шаҳраки  навбунёди Раҳмонободи  ноҳияи Шуғнони ВМКБ   дастраси  мардум гардид. Номбурда гуфт, ки  шурӯъ аз фасли баҳор  намудҳои гуногуни гулу буттаҳо низ  ба ин  мавзеъ   барои парвариш оварда мешаванд. Доктори илмҳои биологӣ  Саидмир Шоҳмансуров  баҳри шинондан ва парвариши хуби кучати нихолҳо  ба аҳолии шаҳраки Раҳмонобод  маслиҳату тавсияҳои судманд пешкаш намуд.